Морам да признам дека бев зачуден за тоа како нашиве медиуми упорно ја игнорираат оваа исклучително важна вест. Решив тоа да им го посочам. Им испратив е-маил:

"Почитувани,

Во продолжение е линк до интересна вест за Руско-Грузиска сајбер војна која би требало да ја проследите и во вашите медиуми: http://it.com.mk/index.php/Vesti/Svet/Rusko-Gruziska-sajber-vojna

Поздрав,
Дамјан
Главен уредник на IT.com.mk"

Но и по 2 дена ништо не се случи, не добив ниту повратен маил од никој од 10-те медиуми, во кои имаше и онлајн весници, ТВ и печатени медиуми.

По 3 дена, НетПрес објавува напис поврзан со оваа тема, насловен "Русите ја добија првата интернет војна":

Вест од НетПрес

Текстот е очигледно напишан од некој што не ја познава суштинската тема на веста. Веднаш започна да се фаќа сеир за грешките.

Повторно им испратив е-маил на НетПрес, овојпат за да им укажам на грешките:

"Почитувани,

Вашиот текст насловен "Русите ја добија првата интернет војна" содржи голем број на неточни информации. Ви ги посочувам следниве грешки:
- Не е истакнат официјален став на Русија дека сајбер војната е потег на руската војска
- Ова не е прва сајбер војна во историјата
- На 7 Август не биле срушени СИТЕ грузиски сајтови
- DDoS не е НОВ вирус, туку вид на сајбер напад
- DDoS НЕ ги оневозможува операторите на сајтот да ја изменат содржината, туку ги преоптеретуваат серверите со барања
- Постои официјална интервенција од Естонците со испраќање на компјутерски експерти, Google воопшто не е вмешан во таков чин, туку Грузија самоиницијативно го користат бесплатниот сервис на Google

За порелевантни информации:
http://it.com.mk/index.php/Vesti/Svet/Rusko-Gruziska-sajber-vojna

Се надевам ќе ги исправите грешките,
Дамјан Арсовски"

Но нема никаков одговор и никаква реакција. Веста си остана таква - смешна и целосно погрешна, а бидејќи НетПрес е новинска агенција, истата таа буквално глупава вест беше проследена и во други медиуми, како на пример Точка.

Но тоа не е сé... најверојатно поттикнати од темата за оваа сајбер војна, која патем не ја објавија, македонските медиуми почнаа да пласираат вести на тема хакери, сајбер војни и онлајн случувања, но концентрирајќи се само на локално ниво. Нема потреба да напоменам дека тоа го направија целосно непрофесионално и пак во некои случаи крајно хумористично. Па така, деновиве кружеа следниве новости:

• Сител објави вест насловена "Спорот со името - војна меѓу хакерите на интернет" во која го објави тврдењето на некоја си група наречена "Обединета бригада за разузнавање и контраразузнавање" (за која искрено не знам од каде имаат чуено ниту пак во веста се наведува од каде им се информациите за таа „бригада“) која тврди дека го хакирала сајтот на грчката влада. Поаѓајќи од помислата како грчките медиуми дигаат паника околу секој малечок настан поврзан со Македонија, доколку навистина се има случено нешто вакво ова би била топ сторија. Дополнително во истата вест се наоѓаат и онлајн случувањата и преписките кои се случуваат на Knol меѓу македонските и грчките корисници, кои претпоставувам според насловот Сител ги карактеризира како хакери.
• Слично на Сител и Време во петокот објави напис "Хакерските војски се судрија кај Гугл" во кој индивидуалното коментирање на разни блогови и сајтови на теми поврзани со спорот со името го наслови како "националистичка војна". Во написот беше објавено и дека бил хакиран некој сајт поврзан со ноќниот живот во Македонија од страна на грчки хакери (а од каде тврдењето дека нападот не е можеби баш од Македонија туку од Грција не знам, но ете пресудиле според оставените содржини). Понатаму во текстот повторно се објаснува за анти-македонските и анти-грчките содржини на Knol и YouTube и како тоа било чин на "хакерските војски" на двете држави. Lolz
• А1 пак, да не остане покусa додека другите објавуваат за нешто што се случува онлајн, ја објави веста "Македонија нема заштита од хакерски напади" во која појаснува дека Македонија нема официјален тим за одговор при компјутерски инциденти (нешто во вид на CIRT/CERT тимови) што е сосема точно. Наместо веста да ја поврзе со моменталната сајбер војна и уште подобро да ја објасни потребата од еден таков тим, А1 ја поткрепува со изјави на министерот Иво Ивановски кој вели дека се планира создавање на нешто такво во соработка со Центарот за управување со кризи.

Во веста на А1 и Сител изјави дава и Филип од Метаморфозис. Двете изјави се или неповрзани со остатокот од веста или пак се нејасни. Искрено не ми е јасно зошто во секој текст поврзан со ИТ во македонските медиуми се земаат изјави од само еден или двајца исти луѓе. Дали се тие експерти за сите ИТ области и се единствени познавачи на темата? Зошто да не се слушне и мислењето на некој друг кој е навистина поврзан со случувањата?

Друго, не ми е јасно зошто од една страна беше игнорирана веста за случувањата на рускиот и грузискиот сајбер простор, а од друга беа објавувани текстови за "интернет војни" помеѓу неколку македонски и грчки интернет корисници (за драматизација опишани како "хакерски војски") кои не правеле ништо друго освен што се инателе преку коментари и постови. Таквите написи на интернет се поттикнати од самите медиуми и националистичките содржини кои тие ги објавуваат.

Доколку сакаме Македонија да ја направиме "Земја на информатичари" не треба да се пишуваат и објавуваат содржини поврзани со информатичката технологија кои се целосно погрешни. За да се избегне објавувањето на ваквите и слични вести кои имаат негативно влијание, не треба луѓе кои немаат познавање од ИТ областа да обработуваат вести на таа тема без дополнително информирање.

ИТ вест не треба да се третира како една "обична" вест бидејќи за да се пренесе правилно бара дополнително разбирање кое може да се стекне на многу лесен начин, со мало истражување или "гуглање", читање на напис на Wikipedia или пак искористување на останатите можности за информирање и учење кои ги нуди глобалната мрежа. Сите сме сведоци дека доколку тоа не се направи и понатаму ќе се објавуваат смешни текстови како оној за "новиот вид на вирус - DDoS" кој ги нападнал СИТЕ грузиски сајтови. :-)

Треба да престанеме и да мислиме дека живееме надвор од светот. Ваквите текстови во кои се пишува и дека Google има пратено компјутерски експерти да помогнат на Грузија, во крајно сценарио можат да бидат опасни и за новинарите и медиумите бидејќи доколку правниот оддел на Google дојде до ваквата вест може слободно да ги тужи за објавување на неточни информации.