Бидејќи сум корисник на мобилните услугите уште од времето кога "постоеше" Мобимак, добро се сеќавам на проблемите кои оваа компанија ги задаваше со говорното сандаче и неговото тарифирање уште тогаш, но исто така се сеќавам на тоа дека дека пораката на говорната пошта беше подолга.

Порано кога ќе го добиевте мејли, покрај тоа што ќе ви ги земеше парите во истиот момент кога ќе го слушнете оној убав глас, мислам дека пораката одеше нешто во стил: "Го добивте мејли... па се кажуваше телефонскиот број или личната порака, па се објаснуваше како да оставите порака (со притискање на тараба или затворање и сл.)"

Целиот овој процес траеше неколку секунди, но денеска бев видно изненаден кога се обидов да повикам телефонски број кој во моментот беше недостапен и има вклучено мејли и пред да слушнам било што бев истарифиран. Мејли пораката беше: "Го добивте мејли, оставете порака по звучниот сигнал. (и се вклучува звучниот сигнал)"

Интересно е што ова траеше само 3 секунди и веднаш потоа почна тарифирањето. Во тој момент се сетив дека пораката не е како порано и е "прекратка", па си реков да проверам како е со Космофон и со ВИП и дали практикуваат иста политика.

Активирав на број од Космофон говорно сандаче кога телефонот ќе е недостапен со јавување во корисничката поддршка 124, и потоа се обидов од број на Т-мобиле да го добијам недостапниот број 075... Ја добив пораката: "You have reached the voicemail box of (се диктира бројот), at the tone please record your message, press hash or just hang up. (тука се вклучува звучниот сигнал)"

Пораката траеше некаде околу 20 секунди, не 3, ама затоа останав без 20 и нешто денари кредит и покрај тоа што исклучив пред да се вклучи звучниот сигнал.

Случајот со ВИП е следен, кога ќе се вклучи говорното сандаче, ја слушате следнава порака: "Ја добивте ВИП секретарката на +389 (се диктира бројот). Ве молиме оставете порака по звучниот сигнал."

Пораката трае најмалку 13 секунди, а ми беа наплатени околу 15 денари (вртев од 075 број) и покрај исклучувањето пред звучниот сигнал.

Намерно правев комбинации со броеви од различни мрежи за да видам што ќе се случи, и крајно сум разочаран од резултатот... но, како што вели онаа македонска поговорка: се додека има "овци", ќе има и "волна"...