"Неограничен интернет-сообраќај со брзина до 10 Mbps"... Неограничен сообраќај!? дефинитивно моќна понуда на T-Home за овие простори. Звучи одлично се додека не го прочитате делот напишан со мали букви кој дообјаснува "За неограничениот интернет сообраќај важи политика на фер користење која подразбира сообраќај од 150 GB месечно. Под надминувањето на овој сообраќај, брзината на пристап се намалува на 64/64 kbps."

Во оваа индустрија "неограничениот интернет" пропратен со "политика на фер користење" е доста познат маркетиншки трик, применуван од телекомите ширум целиот свет и покрај тоа што од технички аспект, денешнава технологија и нејзините ограничувања не овозможуваат остварување на такво нешто.

Под остварен интернет сообраќај или bandwidth по дефиниција се подразбира количеството на пренесени информации преку канал за комуникација изразена со циклуси во секунда (херци Hz) или битови во секунда (bps), односно разликата помеѓу најголемата и најмалата фреквенција што ги пропушта каналот за комуникација. Бидејќи количината на интернет сообраќајот е ограничена од капацитетите на комуникациските канали и линкови, едноставно е технички невозможно да се оствари *неограничен* сообраќај... сообраќај во огромни количини да, но не и во *неограничени*.

Сепак, триков засега функционира одлично за провајдерите... покрај Македонски Телеком од поголемите ИСП кај нас забележав дека го користат Neotel, On.net и Cabletel, кои пак под неограничено не подразбираат 150 ГБ... Cabletel под неограничено, реално мисли на 10 гигабајти трансфер во најосновниот пакет, додека Neotel и Onnet во понудата на нивниот сајт сеуште немаат прецизирано што е тоа неограничено. Верувам дека во договорите кои ги даваат на корисниците е појаснето.

Со рекламирање на *неограничен* интернет сообраќај, т.е. нешто што технички неможе да биде изведено, провајдерите не ги почитуваат правата на своите корисници и едноставно ги лажат своите (идни) клиенти. Тие легално заштитувајќи се под "политиката за фер користење" која никаде детално не ја објаснуваат на своите сајтови и под која наводно T-Home подразбирале 150 ГБ а Cabletel 10 ГБ, ја искористуваат довербата кај корисниците за да остварат поголеми профити. А со оглед на тоа дека повеќето компании промовираат неограничен интернет пристап, претпоставувам дека трикот функционира. А и зошто не би функционирал, од корисничка перспектива "неограничен сообраќај" звучи многу подобро од "ограничување од неколку гигабајти"...

Иаку не сме земја членка на ЕУ, се надевам дека телеком реформите кои Европската Унија планира да ги воведе наскоро ќе ја спречат оваа злоупотреба на правата на корисниците и ќе не заштитат од "неограничени" понуди.