Дизајнот на Eee 1000HE, спореден со конкуренцијата, е убедливо попривлечен, иако во тој поглед како негативна страна може да се спомене сјајната текстура на која видно можат да се забележат отпечатоци од прсти после првиот допир. Но ништо сериозно, едно бришење со ракав или крпа и решен проблем. :)

На десната страна се наоѓа читач на картички (4 во 1), два USB порта и VGA порт за конектирање со надворешен екран. Левата страна е исполнета со уште еден USB порт, место за слушалки и микрофон, Ethernet порт и вградена мала Kensington "брава" за заклучување. Над мониторот се наоѓа интегрирана веб камера.

Најголемата физичка промена на овој модел е тастатурата (која е 92% од тастатурата кај лаптоп со нормална големина) преку која ASUS ги исправа доста критикуваните недостатоци во претходните Eee модели, каде што тастатурите се гласни при куцање и несоодветно подредени со изместени стандардни копчиња.

Над тастатурата, се наоѓаат четири сребрени копчиња од кои првите две служат за менување и подесување на дисплејот и профилот, додека другите две можат да бидат подесени по потреба. Маус падот на допир и е ист како кај претходниот модел 1000H и практично сместен на подлогата.

Широкиот дисплеј нуди зададена резолуција од 1024 х 600 пиксели, што е еден вид стандард кај мини лаптоп компјутерите. Зависно од потребите, горе споменатите копчиња над тастатурата овозможуваат брзо менување на резолуцијата.

Eee PC 1000HE е опремен со 1.66 GHz Intel Atom N280 процесор, кој е специјално дизајниран за вакви лаптоп модели. Овој процесор е релативно побрз од Intel-овиот модел N270 кој е вграден во голем број други мини преносливи компјутери. Другите хардверски компоненти кои доаѓаат во овој модел се Seagate хард диск од 160 гигабајти со 5400 rpm, 128 МБ мобилна Intel GMA 950 графичка, како и 1 ГБ DDR2 SD РАМ на 544 MHz.

Клучниот момент кај овој Eee PC е неговата батерија која според ASUS, може да трае и до 9.5 часа - доколку е намален контрастот на 40% и се исклучени безжичниот интернет, Bluetooth и веб камерата. Во други зборови, со нормално користење може да трае од 5-7 часа, што сепак е голема предност.

Eee 1000HE е тенок само 3.5 цм, а тежи 1.5 килограми, па така не претставува никаков проблем да го носите со себе во ранец или торба каде и да одите - што всушност е неговата првична намена. Цената на моделот (околу 25.000 денари) не е воопшто скапа кога ќе се земат во предвид перформансите и големината.

Спореден со останатите 10`` мини лаптоп компјутери, Eee PC 1000HE е доста добар и економичен избор.