Создаден во септември, 2005 година, Meebo.com доби неколку признанија како 65-то место на листата "100 Најдобри Продукти во 2006" од страна на списанието PC World, и беше исто така истакнат во листата на Time, "Топ 50 Најкул сајтови за 2006".

Сервисов е одличен доколку се наоѓате на компјутер каде што го нема инсталирано ИМ клиентот кој ви е потребен, па наместо да се мачите со преземања и инсталации, ви овозможува на брз начин да комуницирате со пријателите. Доста е корисен и доколку се наоѓате зад заштитени мрежи кои не дозволуваат конектирање на ИМ клиенти, од причина што пристапувате на обичен домен и се конектирате на порт 443 (HTTPS), а подоцна Meebo си се поврзува директно со другите сервиси.

Го користам подолго време и слободно можам да кажам дека е брз, стабилен, и освен банер кој се појавува најдолу на сајтот (кој исто така има опција за исклучувањее) кога ќе се вклучите нема некои си други работи кои би го замарале корисникот. Интересно е тоа што луѓето кои работат на сајтот постојано вршат измени, подобрувања и интеграција на нови сервиси, како на пример Facebook Chat и размена на фајлови помеѓу корисници. А да, достапен е и на поголем број јазици, меѓу кои и македонскиот кој е делумно преведен (недостасува превод на 300 зборови), но вие можете да го смените тоа.

Доколку ви се допаѓа сервисот може да си отворите и Meebo корисничко име кое ќе ви даде пристап и до дополнителни функции како Meebo Rooms, чет соби каде што ќе можете да си хостирате и посебен разговор помеѓу повеќе пријатели. Слично на mIRC, корисникот кој го започнал одговор има контрола над него и може да дава пристап и да банира други.

Информација дека во април 2008, Meebo има добиено инвестиција од 25 милиони долари, дава доста позитивна прогноза за иднината на сервисот.