Цела една година, започнувајќи од 21 Март 2007, работевме само со форумот, обидувајќи се да создадеме вистинско место за ИТ муабети... кога по точно една година бројките достигнаа над 2.000 членови и над 40.000 мислења, одлучивме да го претставивме и порталот кој беше во графичка и концептуална изработка скоро година ипол и во кој беше вложен огромен труд, нормално пропратен со мал милион технички и организациски проблеми...

Што постигнавме во овие 2 години? (...или што ние сакаме да веруваме дека сме постигнале...)
Во изминатите две години, го позициониравме IT.com.mk како сајт на кој може слободно да се дискутира и научи нешто повеќе за информатичката технологија и последните трендови во дигиталниот свет. Денеска форумот брои повеќе од 3.600 регистрирани членови, над 8.400 отворени теми и повеќе од 108.000 постови. Благодарение на 72-те распоредени категории, на форумот има теми поврзани со се и сешто од ИКТ секторот.

На информативниот дел, односно порталот кој посебно во овој период е под активна организациска реконструкција, досега објавивме голем број на авторски содржини кои се концентрираат на теми/дискусии поврзани и интересни за овој регион, обидувајќи се да ја исполниме нашата мисија да го едуцираме, поддржиме и промовираме македонскиот ИКТ потенцијал.

Преку IT.com.mk на македонскиот онлајн простор ја претставивме и идејата за "веб 2.0 медиум", односно медиум кој на подобар и што поинтерактивен начин ќе се поврзе и ќе комуницира со своите читатели искористувајќи ги онлајн сервисите како Flickr, YouTube, Facebook, Twitter, SlideShare, DocStoc и многу други... кои сигурно ги имате забележано при читањето на текстовите и низ многу делови на сајтот, вклучувајќи ја и почетната страна.

Првиот дизајн на IT.com.mk

Што е следно?
Она што денеска е претставено на IT.com.mk е само дел од целиот планиран проект кој вклучува и развој на доста интересни сервиси. Причините зошто имплементирањето на некои аспекти од проектот се одвиваат со намалено темпо можат да се пронајдат во големиот број технички, организациски како и финансиски предизвици со кои се соочуваме. Но далеку од тоа дека се имаме откажано од нив и се надеваме дека набрзо, со голема поддршка на корисниците ќе имаме можност да ги објавиме...

Тимот на IT.com.mk и понатаму ќе продолжи со развојот на овој проект и исполнување на целта - поактивно објавување, создавање на поголема онлајн ИТ заедница за која се планираат и голем број активности, како и воведување на други новости и сервиси кои ќе го подобрат искуството на читателите на сајтот.

Нека ни е среќен вториот роденден и да се надеваме дека замислените желби ќе ни се остварат! :))