е-Општество.мк конференцијата беше на правиот пат, се разговараше за темите за заштита на децата, градење на инфраструктура на знаење преку онлајн магазини и библиотеки, разбирање на меѓународните стандарди, соработки... со еден збор организирање за подобро образование со помош на користење на информатичко-комуникациската технологија.

Низ целата конференција покрај разните теми се провлекуваше една прашање - „Што се случува со слепите деца?“ што подоцна стана интересна општа тема која ги покри сите проблеми и бенефиции за сите студенти/ученици, а не само за маргинализираните.

Првин, прашањето беше поставено од публиката и за време на втората сесија „Проекти за ИКТ во образованието“ на која излагачи беа Благица Андреева од Министерството за информатичко општество и Илија Лазаревски од Министерството за образование и наука. „Што со слепите деца? Компјутери има, но има ли софтвер за нивните потреби?“ ги остави и двата претставника на министерствата збунети за на крај да завршат со одговорот „Ќе се потрудиме да направиме нешто за тоа.“

Темата, подоцна доби поткрепа со излагањето на Лидија Крстевска-Дојчиновска од „Отворете ги прозорците“ која зборуваше за децата со хендикеп и нивната потреба за интернет.

„Опциите за пристап ги има на секој оперативен систем, отворете го само Control Panel. Не се потребни тендери и набавки ... треба само прилагодување на уредите од стандарниот компјутер." рече таа и илустрираше неколку слики на модифицирани обични тастатури и мауси за децата со хендикеп.

„Што добиваат децата од користење на компјутер: зголемено внимание бидејќи компјутерите им се интересни, развој на повеќе сетила со слика, звук и бои, збогатување на речникот преку комуникација и читање, видео игри кои ја стимулираат креативноста и најважно чувството на среќа и самодоверба.“ рече г-ѓа. Крстевска-Дојчиновска.

Таа на крај го потврди со пример тоа што го зборуваше. На својата PowerPoint презентација ja престави Ирена, слепа студентка која е на пост-дипломски студии на Правниот факултет во Скопје, живее сама во студентски дом и своите испити ги полага преку електронски пат.

Најверојатно Ирена немаше да стигне таму каде што е денеска ако ја немаше помошта на информатичката технологија и најважно од се поддршката на нејзините професори. Затоа напишав дека оваа тема е важна за сите ученици и студенти.

Претставувањето на компјутери и хардвер не може да надомести доколку професорот/учителот/родителот не се свесни за можностите на технологијата. Исто така неможе да се очекува студентите и учениците да ги почитуваат нормите и правилата ако не гледаат корист од нив. Така да како што рече г-динот. Гушев „Целта е да се научат методите“ односно да се разбере начинот како ИКТ да се искористи правилно.

На крај заклучокот е дека Македонија има пред себе огромни предизвици кои не се решаваат само со едноставно купување на компјутери.

Додаток:
Вчера беше објавен проектот на ЕУ за заштита на децата за кој европската комесарка Вивиен Ридинг (Vivien Reading) рече: „Бидејќи овие технологии [интернетот и мобилните телефони] им помагаат на децата во учењето и им пружаат нови интересни начини да се социјализираат, тие се побрзи во користењето на технологијата пред родителите. Ние мора да се осигураме дека децата кога користат онлајн или сервис за мобилен, ќе можат да ги препознаат потенцијалните ризици и да се справат со нив.“

Текстови за софтвер и решенија за слепи луѓе.

Повеќе слики можат да се погледнат на нашиот Flickr профил во сетот e-Општество.мк 2008.

Забелешка: Не можевме да го покриеме настанот преку Twitter бидејќи немаше интернет, што е пропуст на организаторот. Информатичко општество без пристап до интернет не води никаде. :-)