Ептен ми се допадна идејата за правата на децата на интернет и особено 10-те избрани права кои луѓето ги ставиле на постер кој требало и веројатно се раширил лепејќи го по училиштата и сличните образовни установи па како надополнување би сакал да го дадам и мојот допринес за оваа тема, односно да набројам некои права на децата на интернет кои во никој случај не смеат да се пропуштат:

- Имам право слободно да се смеjам на содржините на интернет.
- Имам право да прекинам со смеењето кога ќе осетам дека не ми е смешно.
- Имам право да сурфам со една рака.
- Имам право да го прекинам сурфањето и да отидам да си ги извршам природните потреби во тоалетот по што слободно смеам да се вратам и да продолжам со сурфањето.
- Имам право да дишам на уста кога сурфам на интернет.
- Имам право да ги исмевам останатите на интернет.
- Имам право да ме манипулираат на интернет.
- Имам право да ги поддржувам правата на животните на интернет.
- Имам право да се осеќам тажно поради загинатите во Втората светска војна на интернет.
- Имам право да чувствувам вина доколку преземам работи за кои не сум платил.
- Имам право да не се чувствувам виновен поради било што што го правам на интернет.
- Имам право да не се чувствувам виновен доколку ми се приспие сурфајќи на интернет.

Децата како "најлесно манипулативни" суштества меѓу вас/нас мора да ги образуваме на секое поле од животот користејќи ги сите можни средства што ни се на располагање, како на пример образовниот систем кој ни е блиску до совршен, разни кампањи по секаков вид медиуми организирани како од владините организации така и невладините организации кои посебно сакам да ги истакнам бидејќи си ја работат својата работа врз основа на добронамерената цел која си ја имаат поставено. Изгледа дека тие се едни од ретките кои сфатиле дека има нешто побитно од индивидуалната корист.

Токму тоа го покажуваат и луѓево од проектот CRISP (Children’s Rights on the Internet – Safe and Protected!) кој е спроведен од Фондација Метаморфозис со финансиска поддршка од Европската унија, што покрај оваа мала иницијатива работат уште поангажирано на организирање разни семинари од кои единствена корист ќе имаат учесниците со тоа што ќе бидат обучени како да ги препознаат и да ги обезбедат "природно" осигураните права на децата на интернет во пракса.

Прекрасно! Продолжете со исто темпо!

</sarcasm>