Постов беше инспириран додека ги прегледував сликите од Cisco Expo 2008 на кое присуствувавме овие два дена и за што веројатно веќе прочитавте.

Имено сликата што ме инспирираше е следнава:

Сликата е од презентацијата на Maciej Bocian за Cisco ACE во која на доста едноставен и разбирлив за секого начин беа објаснети опасностите и заканите во денешниот сајбер свет. Но, секако оваа тема беше само губење време за најголемиот дел од посетителите, кога истовремено своето време можeа далеку "попродуктивно" да го искористат за слушање на, на пример, презентацијата на Славчо Ангеловски, генералниот директор на PEXIM кој детално го исчита портфолиото на својата компанија.

Некако ова ми прикажува подолга приказна и одговор на темите кои во последно време се вртат наоколу за грчко-македонската "сајбер војна", односно дифејсирањето на некои сајтови на поголеми македонски медиуми и владини онлајн сервиси што пак имплицира дискусија општо за тоа дали и колку (ако воопшто) генерално ИТ секторот во фирмите и институциите кај нас посветува внимание на (компјутерската) безбедноста на нивните системи и сервиси. Некои дискусии се достапни на следниве линкови: [1] и [2].

Повеќе слики од конференцијата може да видите на нашиот Flickr профил.