Алатката ги следи сите земјотреси кои се случуваат низ Македонија при тоа одблежувајќи го датумот, времето, местото со мапа и јачината на секој индивидуален земјотрес.

„Земјотреси“ е во бета и стартуваше пред неколку дена на 8 јуни и има информации за 6 земјотреси од кои 5 се во Дојранско.

„Ова го направив веднаш по серијата земјотреси кои што неодамна се случуваа во Југоисточна Македонија со цел да постои место каде што ќе можат да се следат земјотресите на територијата на РМ и се труди да ги претстави достапните информации за овие земјотреси на начин што е можно поблизок до обичниот човек.

Земјотреси е напишано во Python врз платформата за веб-апликации од Google: Google AppEngine. Кодот (освен некои „тајни“ информации како API клучеви) се оставени под GPLv3 и CreativeCommons лиценца и се достапни на git репозитарот.“ вели Стојан Димитровски a.k.a аct1v8.

Податоците за „Земјотреси“ се земаат од RSS фидот на EMSC-CSEM што е Европски-медитерански сеизмолошки центар на кој можат да се најдат големи број информации за земјотресите.

Сервисот Земјотреси на Стојан е одличен пример за како да се искористат бесплатни и лесно достапни алатки за да се дојде до детални информации.