Google побрза да го одстрани проблемот кој предизвикува телефонот веднаш после вклучувањето било кој внесен текст да го интерпретира како команда. Како резултат на тоа, Google за брзо време создаде закрпа за багот, која наскоро ќе биде достапна за корисниците во Велика Британија.

Багот бил откриен кога еден корисник на телефонот го напишал зборот "reboot" во текстовна порака, веднаш после рестартирање на телефонот. "Јас бев на средината од текстуалниот разговор меѓу мене и мојата девојка и таа ме праша зошто не одговарам на пораките", вели корисникот jdhorvat, во објаснувањето на откриениот проблем на веб страницата за пријавување на проблеми на Google. "Тукушто го рестартирав мојот телефон и првото нешто што го напишав беше одговор на нејзината порака кој во себе го содржеше зборот "Reboot" - кој на мое изненадување, го рестартира мојот телефон."

Телефонот на Google, којшто користи  оперативен систем Android, се продава од страна на T-Mobile под името "G1".

Google го одстрани проблемот со надоградба за софтверот на телефонот која автоматски ќе се инсталира на телефоните на корисниците. "Бевме известени за овој проблем и направивме надоградба," изјави портпаролот на Google, "и моментално работиме со нашите партнери да ја испорачаме надоградбата до корисниците."

Корисниците во САД веќе пријавија дека ја примиле надградбата. Од Google изјавија дека корисниците од Велика Британија ќе го добијат надополнувањето најкасно до 12-ти ноември.