Можеби не се првите, англиската кралица Елизабета има свој канал на популарниот видео сајт уште од 2007, но сепак Ватикан го знае потенцијалот на интернетот. Имаат своја веб страна уште од 1995, а од видеото од нивниот канал може да се види дека Ватикан е сериозен и разбира дека интернетот е алатката што ќе ги зближи со верниците и можеби уште поважно за нив, ќе им донесе нова и помлада публика.

Во истиот ден кога се објави каналот на Ватикан на YouTube, во текст објавен на страницата на Ватикан, за престојниот 43 Светски ден на комуникациите, папата Бенедикт XVI напиша „Новите технологии исто така ја отворија вратата на дијалогот меѓу луѓето од различни земји, култури и религии. Новата дигитална арена, наречена сајбер простор, им овозможува да се сретнат и да си ги разберат еден на друг традициите и вредностите“, но додаде и дека интернетот може да ги изолира луѓето од реалниот свет.

Сепак, како што ја знаат комуникациската вредност (читај: ширење на пораки) на интернетот, така Ватикан ги знае и опасностите. Ватикан се надева дека Google ќе им помогне да ја контролираат содржината - каде се појавува и како се користи - со цел на зачувување на имиџот на папата. Но тоа најверојатно ќе биде ограничено само на нивниот канал на YouTube.

Надополнување 23.05.2009:
Со нов сајт Ватикан понуди апликација „Сретнете се со папата на Facebook“ и уште една со која католиците ќе можат да ги следат говорите на папата на iPhone и iPod.

Доколку сте на Facebook нема да добиете порака „Папата сака да ви биде пријател“ но преку апликациите ќе можете да комуницирате со него. Односно ќе може да се следат неговите говори, пораки, да се гледаат слики... се што се прави на Facebook.

„Разбираме дека црква која не комуницира, престанува да биде црква“ рече Паул Тиге, секретар на ватиканскиот одел за комуникација. „Младите денес не ги користат традиционалните медиуми како весниците и магазините за информации и забава. Тие се насочени кон друга медиумска култура, и ова е нашиот потег да се осигураме дека црквата е присутна во таа комуникациска култура“ вели г-дин. Тиге.

Претходно напишавме за YouTube каналот на папата, но со Pope2you.net, доста интересно дизајниран сајт, се организирани сите Веб 2.0 сервиси кои папата ги користи. Дури има и Wiki.