И поевтино од такси, особено ако не брзаш. И во автобус може да се случи да мирисаш нечија пот или нуспојави на метаболизмот, но барем можеш да се тргнеш на друго место.

А што ако “испушти гулапче” возачот на таксито, како што еднаш ми се случи мене? Кај ќе бегаш од тој “егзотичен” мирис? Џабе отварав прозор, џабе луѓето зачудено ме гледаа...”види го моронон, отвара џам во Јануари…”. Се симнав барем три километри порано. Жива вистина, сакајте верувајте, сакајте не....

Сега вероватно се прашувате – што има врска настанот во автобусот со сервисот на NOKIA. Ништо, во суштина. Освен смрдеата. Но, за тоа подоцна. Неколку случки како да ми без предзнаци на она што ми се случи есенва. Иако не сум суеверен, сега си викам дали ќе беше подобро да ги земев в предвид? Ајде да видиме заедно.

ПРВ ПРЕДЗНАК
Елем, возејќи се во 50-ка, слушам муабет помеѓу двајца познаници. Бачкото се фали со нов мобилен. Не ми текнува на моделот – мислам дека беше некоја NOKIA. “Ја купив во ГЕРМАНОС”, вика. Девојката реагира: “Па кај најде во ГЕРМАНОС да купуваш?” Демек, носеле такви и такви телефони, неквалитетни, нејзе и се расипал после три недели, па ништо не направиле во сервисот, па бла бла.... Ај си викам, тури и пепел, нејзино видување. Можеби е точно, но сепак, еден пример не може да биде мерило. Месец – Март или Април, 2006.

ВТОР ПРЕДЗНАК
Месец Јуни, 2006. Седиме така лепо друштво и ладиме...(не е битно)...во BLUE CAFÉ во центар. Еден од нас понесе лаптоп и се кезечевме како блесави на некои видео клипови што ги симнал од нет.
Зад мене двајца ортаци. Еднот огорчен, како да ја фатил жена му со двајца швалери во сендвич, фрчи, пцуе, колне, спомнува се дома, од глушец до мртвачки сандак. Кого и кому? Погаѓате – ГЕРМАНОС. Другиот го теши. А овој првиов крешти: “Блазе си им на овие до нас, имаат на што да се смеат, а мене ми се урла од мука.” Објаснува дека дал куп пари за некојси нов модел на мобилен, а овој му рикнал после (не се сеќавам сега колку) кусо време. Другар му спомнува овластен сервис. “Ма каков сервис, ништо не направиле, демек не можело да се поправи.” Со оглед дека сколовранците во мое друштво правеа солидна врева, а еден кретен тука во близина палеше еден прастар и одамна од Бога простен ТОМОС автоматик без придушувач, не чув за каков и кој сервис се работи. Се сетив на претходно опишаниот случај, ама пак не дадов особено значење на....тоа.

ТРЕТ, НАЈСИЛЕН ПРЕДЗНАК
Месец Септември, 27-ми. 2006 год, btw. Роденден на ќерка ми. Ме удави за нов и добар мобилен, такви имале повеќето во нејзино друштво, демек, со МП3 плеер, блутут, “џипиерес” (не од што знаеше што е тоа и зошто служи). Ај си велам, не е виновна она, ниту јас како родител, има и други родители виновни што размазуваат деца....ај, ќе и ја купам новата NOKIA 6131. Камера, мултимедија, со сите нишани. Жена ми нека бамбури колку сака, отпосле џабе и е. :-)

Тргнав накај - клетиот ГЕРМАНОС! Како не се сопнав, како некој не се обиде да ми го дрпне ташничето или слично, па да се вдадам по него низ Трговски за да го истресам од гаќи, само да не влезам таму.....
Дојдов до врата на ГЕРМАНОС и – ќе ме прегазеше еден “вепар” во човечки облик од отприлика 160 кг, кој љут и со спомнување мајки и шајки излезе од кај нив. ЗОРАНЕ, ИДИОТЕ, НЕ ВЛАГАЈ!

Ама – влегов. А внатре – од љубезни пољубезни. Како ништо да не се случило. Не еден, од мерак два телефони да купиш, за секој случај. Ја пазарив NOKIA-та и прашав за сервис. “Oвластен сервис ни е Alpha Copy, карши Капиштец, кај Радио Бран....”. Знаев каде е – мое (пра)старо маало, тука се родив...во близината.

Трк дома. А бре - мерак било да гледаш онаква радост. Нормално, тогаш си најдобар родител во свет.....
Жена ми некако ја проголта сумата....откако и застана в грло - 16.500,оо денари. Ај си викам, барем ќе и трае неколку години и ќе ме остави на раат.

И траеше. Барем до 20.09.2007. Почна да гаси и да завитлава при вклучување. А и ако се вклучи, ќе може да истера муабет, но знае да се изгаси и да не се вклучи. Ќерка ми е воспитана дека не смее и нема потреба да лаже, па така и верував (а верувам и ден денес) дека вода или било каква течност не паднала врз телефонот. Ниту пак е трескан од земја.

Ај си велам, да видиме во сервис, и онака не е истечена гаранцијата. Датум – 21.09.2007, Петок.
Ме враќаат од врата – затвараат. Крај работно време. И еден дечко (белки нивни сервисер) ме праша што е проблемот со телефонот. Му објаснив, па рече сепак да го донесам во Понеделник, да не се нагаѓало.

Во Понеделникот (24.09.2007) девојчето љубезно го прима телефонот на сервис, ми издава формулар на кој е внесен опис на кварот и ми вели ќе ви јавиме за два – три дена. Ај, во ред. До Петокот (28.09.2007) никаков абер. Се јавувам, ми велат – од Понеделник (01.10.2007). И демек да не се секирам за гаранцијата, бидејќи телефонот е примен во гарантен рок. ОК, ќе го проголтам и тоа, белки знаат што прават, па нели се овластен сервис?

Во Понеделник не се јавија, ниту ги барав до Среда (03.10.2007), кога ми река дека телефонот во моментот е на сервисирање. Ишала. Петок, 05.10.2007 се јавува девојчето и ми вели да дојдам да го земам телефонот. “Готов е, поправен?” “Не, не може да се поправи”. Со оглед дека во моментот сите вентили ми испопукаа, прегореа речиси сите осигурувачи (освен оној последниот – знакот на здрав разум), ја оставив дома бејзбол палката која секогаш ја носам во кола (за блиски средби, ако дојде до слични – нужна самоодбрана, де), за да не ја употребам и да не направам некој ас со некој нивни телефон, префрлувајќи преку зграда со него, џоамити Бејб Рут. А и да не настрада нечија тиква....
Дојдов, веќе смирен, во т.н. ПРОФЕСИОНАЛЕН СЕРЕ-У-ВИС...се извинувам, СЕРВИС на NOKIA со неинвентивен назив Alpha Copy и од неукото девојченце барам објаснение. Ми вели, сликан е телефонот кога бил отворен, па има доказ дека имало траги од течност, бил отваран и претходно и ставано некакви лепенки на флетот.

Го побарав квази-сервисерот да дојде па тој да ми го објасни тоа, на што добив одговор дека е заузет и може да дојде.

Си велам, ако направам ексцес, ништо не постигнувам, само ќе дојдат сините анѓели по мене. А уште и ќе плаќам некакви отштети. Го побарав газдата, кој во моментот бил на службен пат (па нормално, каде би бил, и ја глупо питање и ондак то!) и ќе се врател идната недела. Се консултирав со една личност на која целосно и верувам, и која е упатена во овие хохштаплерски кругови, и решив да не го оставам телефонот, бидејќи – слаба вајда. И да се тужам е џабе. Повеќе пари ќе изарчам отколку што би бил вреден спорот. А искрено, и со секакви...хммм....не ми се оди на суд. Го послушав советот да побарам написмено зошто не може да се сервисира, како и фотките кои вели дека ги направиле. Добив се што побарав, а тоа можете да го видите.

ШТО СМРДИ ТУКА?
Откако ги видов сликите, прашав зошто сметаат дека трагата од наводната корозија не се поправа, кога без проблем тоа може да се отклони. Ми рекоа дека такви зафати не правеле, бидејќи нема да можеле да ми дадат гаранција за телефонот. А бре луѓе, не ми треба гаранција, ако треба и ќе си платам најрегуларно, дајте поправете го ова. Ама, ние не поправаме такво нешто. Џабе убедував дека ме заболе уво за гаранцијата, побитно ми е да не отидат парите во ветар, дека и писмено ќе го изјавам тоа, дека и ќе платам ако треба...не бре, кога магаре ќе застане на мост...тоа ти е.
Па добро, прашувам, каков сте тоа вие професионален сервис кога не можете ваков квар да отклоните? па демек, имало од порано ставано лепенки на флетот. Ајде де, ставете сосема нов флет, и тој ќе го платам. Јок, брате, не бива.

Какви сомнежи од ова можат да се јават? Прво, телефонот не е отворен во мое присуство, не е направен записник во мое присуство за состојбата на телефонот кога е земен на сервис и истата не ми е предочена и дадена на потпис. Второ, телефонот чмаел кај нив речиси 10 дена. Зарем им требало толку за да увидат за каков квар се работи? Трето, поради сето ова, од каде јас имам доказ дека е сликан баш телефонот на ќерка ми? И дека тие делови не се од него туку од друг таков, расипан модел? Четврто, да не го зезнале они уште повеќе?

Сето ова наведува на сомнежи. Но за жал, остануваат само тоа – сомнежи. Не може ништо да се докаже. Затоа и не тврдам – ПРЕТПОСТАВУВАМ. Но, и тоа е доволно за да се види дека она ПРОФЕСИОНАЛЕН СЕРВИС можат да го закачат на мачката на опашот. НИ ОДДАЛЕКУ НЕ СЕ ПРОФЕСИОНАЛЕН, поради пропустите кои ги наведов и неможноста (или несакањето) да го поправат кварот. Или пак, толку разбираат, толку знаат?

Јас категорично тврдам – телефонот ниту бил отваран ниту поправан од било кого. Од каде им е тој заклучок – не сум паметен!

ЕПИЛОГ
На предлог на еден мој колега од работа, телефонот конечно го однесов кај еден приватен мајстор во населба Драчево. Дечкото е цар за мобилни. Го поправи, си наплати 25 евра, ама ала да му се. И 50 да побараше, немаше да ги жалам.

А за ГЕРМАНОС?
Според онаа старата народна – “Покрај сувото гори и суровото”, и ГЕРМАНОС е на лош глас поради вакви АМАТЕРЧУГИ кои некој ги излажал дека знаат да поправаат мобилни, а тие му поверувале и се нарекле себе си ПРОФЕСИОНАЛЕН сервис. Вината можеби е и на самиот ГЕРМАНОС – дали провериле кои и какви ги земаат да им бидат овластени сервиси и сервисери?

Затоа, во поглед на ГЕРМАНОС сепак сум воздржан. И вината ја лоцирам на друго место. Покажав каде. Дали сум во право, проценете и сами. И пишете ако имате вакви искуства.