Европската Комисија ја повлече тужбата за монопол и се согласи на решението на Microsoft да понуди екран за избор на прелистувачи. Овојпат Microsoft се извлече од казни, за разлика од минатото кога вкупно плати 1.8 милијарди долари заради монопол. Сега понуденото решение ќе им овозможи на европските Windows корисници да одбират кој прелистувач сакаат да користат, наместо да бидат принудени да го користат автоматски инсталираниот Internet Explorer.

За Нели Крос, евро-комесарката за конкурентност, со решението ќе им се даде слободен избор на корисницте.

„Ваквиот слободен избор нема да им служи на луѓето само да си го збогатат интернет искуството, туку ќе биде и пример за компаниите со веб прелистувачи да воведат иновации и да им понудат на луѓето подобри прелистувачи во иднина.“ вели г-ѓа. Крос.

Образованието влијае на користењето на интернет

Пообразованите користат повеќе интернет, односно скоро 90 отсто од корисниците со високо образование редовно користат интернет покажува истражувањето на Eurostat.

Интересно е што возрасната група од 16 до 24 години, има само мала разлика во образованието и користењето интернет. Скоро сите млади користат интернет редовно. Но… драстична разлика се појавува во постарите групи. Пример, во возрасната група од 25 до 35 години, над 90 отсто од луѓето со високо образование користат интернет, додека само 40 отсто од луѓето со ниско образование користат интернет.

Ова има две импликации. Првата е дека тие со пониско образование можеби не заработуваат толку многу да си дозволат претплата за интернет. Но интернетот и не е толку скап. Ако се земе во предвид дека 500 денари е месечна претплата за интернет во Македонија, тогаш во Европа со повисоки стандарди, претпоставката е дека не би требало да е скапо, нели?

Од друга страна, можеби тие со пониско образование се поврзана со професија која од нив не бара да имаат пристап до интернет?

Интернет пенетрацијата во Европа, се зголемува секоја година. Сега скоро 65 отсто од европејците имаат интернет пристап, а планот на ЕУ е сите да бидат поврзани. Но, според оваа истражување, може да се заклучи дека иако сите ќе бидат поврзани сепак има и други фактори кои влијаат колку го користиме и за што го користиме интернетот.